ՀՅԴ Երիտասարդականի Մասնակցութիւնը Քրտական Խաղաղութիւն Եւ Ժողովրդավարութիւն Կուսակցութեան Երիտասարդականի Խորհրդաժողովին

nor zartonk

3-16-15_donig

 

Aztag

ՀՅԴ Բիւրոյի Երիտասարդական գրասենեակը կը հաղորդէ, որ գրասենեակին կազմակերպումով` ՀՅԴ Երիտասարդականի պատուիրակութիւնը 13-էն 15 մարտին մասնակցեցաւ քրտական Խաղաղութիւն եւ ժողովրդավարութիւն կուսակցութեան  երիտասարդականի կազմակերպած խորհրդաժողովին` Տիգրանակերտի մէջ: Պատուիրակութեան անդամներն էին Տօնիկ Տօնապետեան եւ Ցոլեր Աղճեան` Լիբանանէն:

Անիկա կը կոչուէր «Միջին Արեւելքի ժողովրդավար երիտասարդութեան Ա. խորհրդաժողով» եւ անոր նշանաբանն էր` «Երիտասարդութիւնը իր ուժը պիտի ստեղծէ եւ Միջին Արեւելքը պիտի ազատագրէ»:

Խորհրդաժողովին կը մասնակցէին ընկերվարական երիտասարդական միութիւններ տարբեր երկիրներէ եւ շրջաններէ` Հիւսիսային Իրաքի քրտական ինքնավար շրջան, Պաղեստին, Եգիպտոս, Ալճերիա, Թունուզ, Լիբանան եւ Թուրքիոյ մէջ գործող երիտասարդական միութիւններու ներկայացուցիչներ, ինչպէս նաեւ տարբեր երկիրներէ եկած ոչ միութենական երիտասարդներ: Նշելի է, որ ներկայ էր նաեւ Պոլսոյ «Նոր Զարթօնք» կազմակերպութեան ներկայացուցիչը:

Խորհրդաժողովը տեղի ունեցաւ Տիգրանակերտի «Շեքարխոյն» համալիրին մէջ, ուր ներկայ էին աւելի քան 700 ուսանողներ, երիտասարդներ եւ երիտասարդական կազմակերպութիւններ ներկայացուցիչներ:

Խորհրդաժողովը կեդրոնացաւ Միջին Արեւելքի եւ յատկապէս Թուրքիոյ մէջ տիրող երիտասարդական, տնտեսական, քաղաքական, ժողովուրդներու ազատագրութեան, ազատ կամքի արտայայտութեան եւ ինքնորոշման իրաւունքի ձեռքբերման նիւթերուն վրայ:

ՀՅԴ Երիտասարդականի ներկայացուցիչները իրենց խօսքը արտասանեցին` նախ հայերէնով, ապա` թրքերէնով:

Անոնք ողջունելով Խաղաղութիւն եւ ժողովրդավարութիւն կուսակցութեան երիտասարդականի կազմակերպած խորհրդաժողովը, կեդրոնացան հայ ժողովուրդի անցեալի եւ ներկայի կացութեան, Արեւմտահայաստանի մէջ տիրող ներկայ իրավիճակին, կրօնափոխ հայերու հարցերուն եւ ընդհանրապէս Հայոց ցեղասպանութեան վրայ, որն իր անդրադարձը  ունեցած է Միջին Արեւելքի ներկայ կացութեան վրայ: ՀՅԴ Երիտասարդականի ներկայացուցիչները շնորհակալութիւն յայտնելով հրաւէրին համար, շեշտեցին հայ-քրտական փոխյարաբերութիւններու կարեւորութիւնը արծարծուած որոշ հարցեր միասնաբար լուծելու նպատակով:

Խորհրդաժողովէն բացի ՀՅԴ Երիտասարդականի պատուիրակութիւնը հանդիպումներ  ունեցած է տարբեր երկիրներէ եկած պատուիրակութիւններու հետ:

Նշենք, որ ՀՅԴ Երիտասարդականի ներկայացուցիչները անցեալ տարի եւս մասնակցած էին Խաղաղութիւն եւ ժողովրդավարութիւն կուսակցութեան երիտասարդականի կազմակերպած խորհրդաժողովին` Տիգրանակերտի մէջ: